هذي قائمة غير حصرية قابلة للتحوير في الناس إلي كان يواصلو على المنوال هذا
حظوظهم في الدخول إلى الجنة باش تكون ضعيفة برشا :
1 - واحد يمشي لقهوة يعرف أنو كاس التاي فيها بسبعة آلاف و الشيشة ب 25 ألف و
4 كعبات مقروض ب 10 آلاف ... أما رغم ذلك يطلبهم لكل و مبعد يصور الفاتورة و يحطها
في فيسبوك و يكتب عليها فقرة طويلة عريضة تحكي على غلاء الأسعار و إنخفاض الطاقة
الشرائية للمواطن و يختمها ب " Je pleur ma tunisie " ...
2 - عروسة جديدة وقت لي تخرج تحوس تعمل 3 أنواع برفانات، تلبس ذهبها لكل، سي
ديجا تكون صابغة شعرها بالأصفر، تعمل "manucure"
أحمر على الحنة إلي في إديها و تخرج كيف البوسعدية ... و تصور هي و راجلها و تكتب
عليها " soirée inoubliable "
3 - الطفلة إلي تكون ساهرة مع صاحبتها باش يحتفلو بعيد ميلادها و باستها و
هنتها أكثر من 100 مرة فالسهرية ... أما وقت لي تروح لازم تمشي تجري تحل الفيسبوك
و تكتبلها على الحيط متاعها " joueux anniversaire ya 3assla ... " و معاها برشا بوس و قلوب
4 - 3 مالناس قاعدين بحذا بعضهم في نفس البيت و ساهرين يتناقشو بالكتيبة تحت statut كتبو واحد منهم بينما
ينجمو يلوحو أورديناتوراتهم ولا تليفوناتهم و يحكو مع بعضهم ديراكت
5 - واحد حاطط تصويرة تعاطف مع إلي صاير في غزة و نهار كامل و هو يهتري بأطفال
و شهداء غزة ... أما وقت لي إستشهدو أولاد بلادو ما قال عليهم حتى كلمة !!!
6 - صاحبي إلي يخدم في أورونج و عامل تلفون تيليكوم ...
7 - الي يعيش و يخدم في فرانسا، و كان ماخرجلهاش راهو هبل و دخل و خرج فالحلة،
اما نهار كامل يسب فالفرنسيس و عامل روحو موش حامل العيشة معاهم ...
8 - الي(ت)يحط تصويرة ولدو(ها) bébé في الفيسبوك، و وقت لي الناس يكتبولو(ها) كومونتارات عليها...(ت)يبدى يرد على
أساس أنو ال bébé هو الي يرجع عليهم و
يشكر فيهم و يستدعى فيهم باش يجو يطلو عليه و يشوفوه محلاه !!!!
9 - واحد يلبّس ولدو الي عمرو أقل من 10شهور مريول الجمعية إلي يحبها و يصورو
و يحط التصويرة فالفيسبوك ( الناس هاذم إنجم نكتب عليهم كتب كاملة من كثرة ما غلبو
عليا ... )
10 - واحد عمرو ما ريتو عمل حتى نشاط في الفيسبوك من نهار الي قبلتو في قائمة
أصدقائي ... و في أول سفرة عملها خارج تراب الوطن يتاڤي روحو في كل في خطوة يمشيها
في بلاصة معينة ... حتى في توالات المطار ( ريتها تو بعيني ) ...
11 - واحد يكتب ستاتو, ينزل عليه جام, يكتب لروحو كومونتار, و يزيد ينزل عليه
جام ...
12 - وحدة تعمل " copier-coller" لستاتي في الفيسبوك... اما وقت لي تحطو تنسى ما
تنحيش من تحتو ال " j'aime commenter publier" إلي هزتهم مع
الستاتي الأصلاني ...
13 - زوز عرايس يعمللهم المصور تصويرة و هما متكين كل واحد من شيرة بمرافقهم
على الفرش متاعهم و يشوفو لبعضهم و هما يدلدلو في ساقيهم على القاعة ( أي نعم يا
سيدي مازال ثمة منهم الپوزات هاذم، تو ريتها ) و مبعد يحطو التصويرة photo de couverture فالفيسبوك...
14 - واحد يبعثلك ميساج الليلة يهنيك فيه بالعيد من باب النفاق الإجتماعي و من
غدوة وقت لي تشوفو فالشارع يبدل الثنية ...
15 - واحد يبعثلك ميساج " كوبي-كولي" مالي يبعثوهم الناس بمناسبة
العيد و ينسى ما يبدلش فيه تاريخ العيد متاع أولة عامنول ...
16 - واحد ما يكلمش عمو و جارو متعارك معاهم ... أما يفرق فالتهاني ذات اليمين
و ذات الشمال في الفيسبوك و يبعث فالقبل و القلوب للناس لكل ...
17 - واحد يلبس ولدو الصغير ( أو البيبي ) مريول الإفريقي ولا الترجي و يحط
تصويرتو فالفيسبوك ...
18 - واحد يكتب على حيط واحد آخر نهار عيد ميلادو " BonNE anniversaire " ...
19 - طفلة تعدى عام على عرسها و لتو مازالت كل يوم تتحفنا بتصويرة من وطيتها
ولا عرسها ...
20 - الستاجيار الشنوي الجديد إلي يجيب في فطورو معاه و ياكل فالخنافس و
الڤرلّو ...
21 - الأمريكي إلي يخدم معايا و عندو جمعة ما دوشش ... ريحة ضبابطو تتسمع يا
دين الرب !!!
22 - المختار الي يبيع في ايسونس ليبيا في الهبطة متاع سوق الواد في مدنين...
لا لشيئ، فقط على خاطر ما نهضماش برشا
و بالطبيعة العبد لله إلي في عوض يمشي يصلي ركعتين ولا يلها بروحو ... لاهي
يعس على لعباد و ينبر عليهم
