كيفاش تعرف روحك تونسي : المرأة نموذجا

- المرا التونسية تتميز بقدرات رائعة في الشراء و المساومة ، عندها مهارة إنها تشري الحاجة متاع 30 دينار ب5 آلاف كهو، وتحس في لخر إنو إلي يبيع عداها عليها ...

- المرا التونسية هي المرا اللي تبدا حياتها الزوجية تتدهور كان تعدى على عرسها أكثر من عام من غير ما تحبل ...

- المرا التونسية هي المرا اللي حاسة بروحها محسودة من جاراتها  وتاتا سعاد ونادية مرت خالها إبراهيم وعيشة إلي تبيع فالملاوي ...

- المرا التونسية هي المرا اللي عندها 10 سنين و هي تطلب من راجلها يجيبلها ورد و لتو عندها أمل أنو باش يجي نهار و يجيبلها ...

- المرا التونسية هي لمرا الأكثر إيماناً بنظرية “أكيد تو يجي نهار و تنفعنا”، وتلقى أكثر من نص دارها معبية كرادن و حكاك  فارغين ...

- المرا التونسية هي لمرا اللي إسمها لازم يقعد سر وعيب يتقال لا قدام صحاب راجلها ولا بين أصحاب ولادها ... الحديث ديما عليها بضمير الغائب المؤنث ...

- المرا التونسية تمشي تصيف باش تقعد على حرف الشط  تحضر الماكلة و الكسكروتات لراجلها و أولادها و تمدلهم دبشهم  ديراكت بعد ما يخرجو من البحر وتكون شايخة على قوة جهدها ...

- المرا التونسية هي المرا الوحيدة في العالم اللي تنجم تبقى ما تعملش الحنة حزناً على راجلها اللي مات و تنجم تبقى هكاكة حتى لين هي تموت ...

- المرا التونسية هي المرا الوحيدة اللي تبدا تستعد للزواج من أول ما تتولد وحتى لين تعرس، تبدا أمها تشريلها فالسيرفيسات  مإلي عمرها 3 سنين يا بو قلب ...

- المرا التونسية أكثر مرا تتشكي من عدم مساعدة راجلها ليها في أعمال البيت ... وفي نفس ذات الوقت تعلم ولدها أنو راجل و المفروض ما يعاونش مرتو في قضية الدار ...

- المرا التونسية هى المرا اللي عدت شطر عمرها في الكوجينة  اطيب فالكسكسي و الملوخية و الشطر لاخر تغسل فالماعون اللي عملت فيه الكسكسي ...

- المرا التونسية هي المرا المؤمنة بأن تربية لولاد تتلخص في الجملة : “والله لما يجي بوك ونقولو”...

- المرا التونسية هي المرا اللي الخروج عندها يعني شقايل كسكسي و جلبانة وقاطو و قلوب و تاي أخضر ...

- المرا التونسية هي المرا اللي مؤمنة بأنو العيد معناها غسيل زرابي و تنظيف الكوجينة ...

- المرا التونسية تحسها مصرة إلحاحا أنها تقعد مع راجلها دنيا وآخرة ...

- المرا التونسية هي المرا إلي تؤمن بنظرية إن الريجيم أقوال و ليس أفعال ... 

- المرا التونسية هي المرا إلي وقت لي تضحك شوية تخاف على خاطر ضحكت ... و تقعد تستنا في مصيبة تجيها و تقولك "يا ربي تستر ... إنشاءالله خير" ...

وأخيرا المرا التونسية ... يعنى السؤال الأزلي " آآآه ... ثماش حويجة على قريب ؟؟؟ "