• الرئيسية
  • تطبيقة المدونة في ال google sotre
  • تطبيقات الرئيس في google store
  • lundi 6 février 2012

    ياللّي ماشي تعزّي ... حُط الحطّة و إمشي



    كنت كتبت قبل في مناسبتين على صديقي حبيب ( رحمه الله ) : لول ( تنجمو تشوفوه من هنا ) حكيت فيه على حالتو المرضية المستعصية إلي ما اكتشفها كان مؤخرا و كيفاش قاللنا بإلي هو مريض، و الثاني ( تنجم تعملو عليه طلة من هنا ) كان النعي متاعو ... 
    تلمدت الأصحاب نهار الدفينة و العايلة الموسعة زادة و حتى إلي ما يعرفوش جا نهارتها ( لما عرف به من دماثة أخلاق و سعة صدر مع الجميع ) ... بدت مراسم التعزية و الدفن و إنتهت و تعدت في سلاسة و دون حوادث تذكر، أما الشي إلي جبد إنتباهي ( و ما نجمتش نكتب عليه في وقتها لانشغال قلبي بلوعة فراق الصديق ) مخالف تماما لطقوس الحزن و الورع إلي يضفيها مناخ العزاء هذاكا علاش خيرت أني نتطرقلها في التدوينة هذي :) 

    باعتبار أنو واجب العزاء ولا مالأشياء إلي الناس تشبرش بيها و تبين بذخها فيها ... في ما يلي نقدم مجموعة من النصائح لمن فقد أو سيفقد عزيزا عليه ( ليس من باب التشائم أو باب أن أتمنى لكم فراق من تحبون أما على خاطر من المؤمنين بالمقولة إلي كنت فسرتها هنا " احتاطوا بدقيقة من القلق،قد تأتيكم الفجيعة فجأه فمن الجميل حينها ان لا تفزعوا " ) و باش يقيم عزاء :

    - باش تختار بلاصة العزاء : لازمك تختار بلاصة تليق بيك و بالعائلة الكريمة، أشهر الجوامع و أشهر المقرئين على خاطر عرفت أنو إذا كان المقرئ ما يعجبش واحد ينجم ما يمشيش يعزي ( ناس آخر زمان )


    - إختار(ي) كما يجب ألوان و أشكال الفناجين و رد بالك تنسى كيسان " الكريستال " سي نون ثمة ناس تقولك " شبيه هذا ما عطانيش قدر !!! " ... و كان ما عندكش، إتسلف مالجيران ولا إكري
    - رد بالك تغلط و تشري بن عادي ولا دوزيام شوا ... لازم "بن يدر" ولا قهوة فرنسا كان لزم الأمر ... و التاي لازم تجيب حتى الانفوزيون ( ليبتون معناها ) و الماء لازم " صافية " موش "مروة" ولا "معين" و لازم يكون من جميع الأحجام و بارد و سخون ... 
    - النعي ماذابيك تهبطو في جريدة "الفجر" و ما تهبطوش في "المغرب"  خير ما يقولو على المرحوم ماسوني ولا علماني ( والله واحد نسمع فيه ورايا يسأل في إلي بحذاه " المرحوم علماني كهو ولا عنقني زادة ؟؟؟"


    - كان العزاء في حومة شعبية، لازمك تكري باشات كبيرة و كرسي و طواول، و لازم بافلوات في كل بلاصة ...


    نصائح للي ماشي يعزي :

    - كانك تنتخة هز كرهبة كحلة ( أكيد راهو عندك(ي) واحدة ) ... و كانك زوالي(ة) ليا و ليك ربي ... ما تنساش تلبس حاجة كحلة و يا حبذا يكون سروال ترقال 
    - رد بالك تنسى باكو الدخان ال"ميريت" ولا وحدة مالماركات الفاخرة ( كان جابلك صاحبك باكو دخان من فرنسا هزو نهارتها و إقلبو باش تبان التيكة مكتوبة بالفرنسي خير ما يقولو دخان دزاير )
    - للسيدات : أحرصي أنك تلبسي أحسن لبسة عندك ...  كانك متحجبة لازم حجاب من أعز القماشات ، و روبة مخملية إذا كانك سافرة، و ثمة شكون نافح بالعبايات الخليجية ( اقتداءا بدليلتنا الجديدة نحو المدنية " الشيخ موزة " ) ... ما تنساش تلبس الشكاشك إلي عندك ( و حاول اصطناع أنك تخبي فيهم باش ما يبانوش مع تشكشيكة كل مرة باش يشوفوهم )


    - ما تكثرش مالمكياج باش ما تجذبش الأنظار أما رد بالك تنسى الماسكارا ( حفظتها عندي عام و ندمت أني حفظتها ) و متاع " البوبيار" زادة  ( حتى هي حفظتها مع الماسكارا ) ...
    - سبابطكم لازم تكون ذات كعب عالي مسموع الصوت، و للسافرات يا حبذا ال"بوت" الطويل على " كولون " أسود و جوب ...  
    - كذلك وصفة للسافرات، أحرصي أنك تمشي للحجامة قبل ما تمشي للعزاء، و كانك متحجبة، ألوان الحجاب متاعك لازم يغلب عليها اللون الأبيض ...

    اكتشفت أنو المناسبة هذي، كيفها كيف الأعراس، تعتبر تجمع لكل العائلة و الأصدقاء ... لازمك تظهري في أحلى و أبها حلة : إلي سي بي تلقي راجل ...

    في أمان الله حبيب




    6 commentaires:

    1. الله يرحمو ويغفرلو ويدخلو الجنة ..

      يـا سي زياد تشـوف العــجب .. خلي من عشا الميت ..
      اللي يقولك اللحم ما كفاش .. واللي يقولك ناقض ما نعرفش شنوا ..
      ياخي هما يمشوا يعزوا مشاركة ولا باش يزيدو كملو على مرمتهم .. ويخسروهم أكثر من خساير عرس .. عبــاد ضربها الجهل للعظم ..

      RépondreSupprimer
    2. SAlam
      encore ALLAH yar7mou w yna3mou

      mahou marra 9alouha, el wé7ed lezemou yé5ou crédit bech kif ymout yal9a ma yosrof.

      ech t7éb ta3mel kol chay walla madhaher w tabaroj,
      ena 9bal kobnt nasma3 y9oulou, ghnny wela f9ir, el kfan wé7ed, tarf 9méch abyadh, ama tawa walléw yobd3ou fih: 9allek famma qualité mté3 9méch tafra9 !!!! t9oul hal 9méch edoud mech bech youssellou, Allah yahdi w barra.

      ama elli yemchiw y3azzi ma3andek ma rit, ena marra wa7da na3rafha mét 3ammha, 3ala 9ad ma 9a3dou ayamét el 3zé (3 jours) 3ala 9ad ma hia tbadel fi 7wéyéjha w twarri fi les ebsembles elli 3anda, comme quoi rajelha fi italia w mech m5alliha né9ssa 7aja ....

      RépondreSupprimer
    3. @Asma : بعض رمضان حضرت لعزاء في الحومة عارفة علاش يتناقشو !!! قالك الحمص متاع الكسكسي موش طيب بالقدا ... أنا خليتهم و روحت

      @ Anonyme : شكرا على مرورك :) تعيش و ترحم
      هذي إلي تعرفها يمكن راجلها موش مخليها ناقصة لبسة ... أما على خاطر ماهوش عارف أنو مخليها ناقصة عقل

      RépondreSupprimer
    4. الله يرحمو
      حاجتين خطروا على بالي و انا نقرا في مقالك : اولا : تفكّرت فرق جدتي الله يرحمها 5 سنين لتالي لتوة كيف نحكي عليه نقول رانا وقتها جهلنا فعلا (بون انا و الحمد لله خاطيني) لكن اقل ما يقال فيه انو كان حاجة ليكس و روايال ، ولا حول و لا قوة الا بالله ،:/ بخلاف الطباخة (الي يطيبوا سوري) جابوا حتى سبيسياليست متاع زينة طول و كراسي o.O
      انا وقتها نتفرّج و حايرة في عجب ربي ...ضحكتني حكاية الاناقة و لقاء العائلة و الاقارب ، بون انا لو كان جا مكتوبي يستنى فيا في فرق جدتي دونك من الاككيد جداااا انو قطّع لاني كنت تالمون مسمئجة (على قول الاخت الفاضلة و السينيمائية الفذة بكّار) من الشي الي نرا فيه الي تراني تقول نربح فاها اجر نصدّق علاها دنوس ههه لبسة دار و شعر خارج من حرب (بما اني كنت سافرة)
      حاصيلو ...ربي يهدي ما خلق

      الحاجة الثانية : و بخلاف مظاهر الجاهلية الي حكيت علاها انتي نزيدك البدع الي ما اطاح الله بها من سلطان الي نشوفوها في الجنائز و هات عاد من "الاربعينية" و "الفرق" و الخ الخ

      الله يرحمو "حبيب" و يغفر للحيّين على ما "جهلوا"

      RépondreSupprimer
    5. ربي يثبت علينا العقل و الدين :)
      يا نجمة قريت المقال إلي قبلو ولا لا ؟؟ ( باش تنجم تفهم الإطار :) )

      RépondreSupprimer

    جميع الحقوق محفوظة

    جميع الحقوق محفوظة كافة المواد المنشورة في هذا الموقع محفوظة ومحمية بموجب قوانين حقوق النشر والملكية الفكرية لا يجوز نسخ هذه المواد أو إعادة إنتاجها أو نشرها أو تعديلها أو اقتباسها لخلق عمل جديد أو إرسالها أو ترجمتها أو إذاعتها أو إتاحتها للجمهور بأي شكل دون الحصول على إذن كتابي مسبق Creative Commons License
    This work is licensed under a Creative Commons Attribution-NonCommercial-NoDerivs 3.0 Unported License.

    مرحبا

    مرحباً أيها النازل للمرة الأولى .. هذا المنحدر.. مرحباً أيها الراكب ظهر الحرف.. نحو الحتف .. وبث الروح في نبض الحروف. إربط حزام الخوف..أنت في أهزوجة الجن.. بقايا من لحون.. لا تخف .. حصّن الروح ورتّل تعاويذ البقاء... وانطلق في عالم الموتى بقايا من فناء... لا تخف.. واشحن الآهات .. واعصر ما تبقى من دماغ... واكتب..وسجل

    قداش من مرة شافو المدونة

    زورو صفحتنا على الفيسبوك

    المشاركات الشائعة

    إلي يتبعو في حكاياتي