زَيْ ما رڤَصْناش

شي والله شي ... وانا نقول مانيش باش نتكلم في السياسة، يزيني مل كآبة، خليني نفتق شوية سعادة و نحكي على حاجة أخرى
شي والله شي ... نرجع من لول ...

أسوام الطماطم والخضرة و الغلة إلي وصلت لحد فظيع ... تخليك بالسيف تحكي على السياسة
الكيران و المتروات المعبية إلي تزيد كل يوم ... تخليني نحكي على السياسة ...
عدد الحوادث الخيالي إلي نشوفو فيه كل يوم و الإصابات الناتجة على الحالة المزرية متاع الطرقات و المرور ... تخليني نحكي على السياسة ...
الأخبار إلي في الجرايد و التلفزة ... تعمل السكر و الدم و حتى البرص ...
شي والله شي ... حتى خممت نحكي في الكورة ولا الرياضة ... والعار إلي عملهولنا المنتخب و بونطو إنرامو " الذي أقام الدنيا و لم يقعدها " ( يعجبني برشا التعبير هذا ... يفكرني في توفيق العبيدي ) ... تخليك تحكي بالسيف في السياسة ...

نحب نتخبا في بلاصة ... ما فيهاش لا تلفزة و لا جرايد و لا إنترنت و لا زحمة و لا أسعار مجنونة و لا حتى راديون ( إلي تغني عليه فاطمة بوساحة في غناية " يا كرهبة كمال رني رني " )
حتى الناس لا ... باش حتى حد ما يحكيلي في الحكايات هذي ولا يفكرني فيها ...

هاني نقاوم و مانيش باش نتكلم في السياسة بلكل ... تو نحكي في الفن ...
موضوع اليوم : الفن :
منع فيلم " الشاق واق : فيلم حلال " و الفساد إلي نشوفو فيه في السينما و الحوار " الروحي "متاع سوسن معالج، ما ننساوش متحف باردو و سرقة التحف .... يا رسول الله ... شي والله شي ...

نتكلم في المسلسلات و الأغاني ... النوعية هذي من الفنون توضح الذوق العام لل مجتمع و الناس ( يا والله أحوال ) ... و وقت يكون الذوق هابط ولا فيه مشكلة تولي وقتها المشكلة في التعليم و الثقافة و التقصير في التربية و المؤسسات التربوية (يييييييييه) ...

راني قلتلكم ما ثما حتى فايدة ...

باهي يا سيدي نحكي شوية على الحب :) ... ( نعرفكم تحبوها لحكايات هاذي )
حلوة برشا الكلمة هاذي كمعنى عام ... تخلينا نعيشو خيالات و أحاسيس مرهفة و شعور بالأمان و كمشة أحلام و أماني ...
أما ( نعرف شخص يموت على الكلمة هاذي ) نتصور ان الكلمة هاذي تكون ناتجة للي فات الكل ... معناها لازمنا نعيشو في مجتمع سوي في التعليم و التربية و الخدمة و النظام باش الكلمة هاذي يوليلها معنى ... و متوفرلها مناخ صحي باش تنمو و تتواجد ... و كيف ما قال الشعر الفذ هشام الجخ : " الحب حاله ،، الحب مش شعر وقواله ،،، الحب حاجه ما تتوجدش في وسط ناس بتجيب غداها من صناديق الزباله "

شي والله شي ... كيف ما يقول جلال :" زي ما رڤصناش "