من إستمَع إلى همُوم الناس " أكثر ماللاّزِم " مَات همًّا

هاذي عينة مالأحاديث إلي دارت اليوم 17-02-2010 بيني و بين مختلف الناس إلي قابلتهم ... ثمة برشا أحاديث ما عندها حتى هدف و حتى معنى، أما حبيت نحطها لا لشيء إلا على خاطرها ذات بعد ( عجبتني الفازة متاع ذات بعد ... نشهدلي )

عبرلي مرة سامي صاحبي على كرهه لأستاذ العربية، هذاكا القصير و لصلع ( علاش ديما أساتذة العربية نتخيلوهم صلع ؟؟ ) و كيفاش أنو كان وقت لي يدخل للكلاس يبقى ساكت ربع ساعة و هو يثبت في وجوه التلامذة من غير ما ينطق حرف، وقتها كان شادد روحو بالسيف باش ما يدفلش مرارت حلقو عليه، و جاب ربي نجم ... و مبعد قالي أنو قرا في مدرسة المعلمين العليا بالعاني باش يذوق تلامذتو نفس المرارة إلي تجرعها ... وقتها كنت نحب نصارحو أنو ما شفتش طيلة حياتي معلم إسمو سامي ... و لتو مانيش عارف كيفاش ما قتلوش !!!

***

ثنية كاملة للسبيطار و عمي يحكيلي على خطورة مرض السكر إلي يعاني منو و قداش شردو و تعبو من جرت الريقلة ( الحمية بالعربية الفصحى ) إلخ ... إلخ ... وقت لي وصلنا، و بعد ما حللو الطبيب عينة مالدم متاعو، قالو أنو نسبة السكر في الدم متاعو طبيعية ... وقتها تنرفز و زمجر في وجهو و قال : هذا ما يعرف شي مالطب ...

***

عندي برشا نحب نسأل أحمد مطر علاش يستعمل في مفردات المعجم البذيء في أشعارو ... أما مانيش منجم نتخيل إجابة خلاف هاذي : " للتنفيس ليس إلا ... "

***

مالي كانت صغيرة و هما يقولولها باللي باش تاخذ ولد عمها إلي أكبر منها بعامين ... و كانت تقول لا على قوة جهدها ... موش على خاطرو أسمر برشا بركة، أما على خاطرو ( حاشا إلي يقرا ) بهيم برشا ... أما تفاجئت وقت لي سمعت أنو خطب بنية أخرى ... قريب لا هبلت ... و حلفت وقتها أنها باش تاخذ الرجل الأول إلي باش يجي يخطبها ...

***

سافر ( ع ) من قريتو الريفية لمدينة باش يقرا في معه ديني غادي، و كان يرجع للقرية متاعو كل أسبوع نهارت الجمعة، ياخي طلبو منو باش يخطب فيهم نهار الجمعة ... و ولا كل جمعة هكاك ... فرح بالشي هذا برشا على خاطر الناس الكل ولت تقدرو و ولا صاحب مكانة هايلة في البلاد ... أما ولا بالسيف عليه لازم يتصرف بطريقة معينة و يحترم المكانة إلي حط روحو فيها، بعد ما كامل قرايتو اكتشف أنو قيد روحو بحبال و أسلاك روتين صعيب كان يتخلص منو ... تو هو يكره القرية و ما يحبش يرجعلها ... و يكره نهارت الجمعة بالتحديد ...

***

ما نتصورش أنو ثمة واحد صريح مع روحو أكثر من عادل إمام وقت لي قال في واحدة من مسرحياتو : " داحنا ولاد كلب " ...

***

( ف ) يحب يكون إنسان فدلاك ، يحب يعمل الجو بطريقة أخرى، أما ديما ما ينجمش، وين يتكلم تبدا الناس تقهقه بالضحك ... موش على إلي قالو ... أما عليه ...

***
بدا يحكي مع روحو : " ما نعرفش نعوم ... خطي خايب برشا ... ما نعرفش نسوق بسكلات ... قداش خايب صوتي ... لازمني ننتحر !!! "

***

" ألا ليت شعري رجلا فأريه عامرا "... هذا هو كان مطلع قصيدة قالها واحد باش يثبت لصاحبو، إلي يتهم فيه ديما بالسرقة الشعرية، أنو بالحق شاعر !!!

***

نعارك في صاحبي وليد و نقولو إلي يعمل فيه هو السخف بعينه، كيفاش ينجم يتنقل بن البنات و يقول بالي هذا حب، رد علي رد سريع و دامغ في نفس ذات الوقت : " موش قال عبد الله القرشي أنو كان يمارس لعبة الحب جيست باش يستحضر مشاعر كتابة القصيدة، و موش نزار قباني قال زادة بالي تعدو على راسو تسع و ثلاثين تجربة عاطفية فاشلة !!!

***

( خ ) العساس متاع المدرسة الابتدائية إلي قريت فيها ما يعرفش وقتاش تولد بالضبط، و ماهوش عامل منها مشكلة لحكاية ... أما قالي أنو موش عارف علاش وين يسألو واحد على تاريخ ميلادو، يقولو أنو في عشرة سبتمبر و ما يبدلوش بالكل !!!

***

هو شخصيا يكره ريحة السبيطارات و يخاف مالزرارق مالي كان صغير ... أما بوه خلاه يقرا طب بالسيف و مشى لمدينة أخرى ... قبل الفكرة على مضض أما في شطر العام بطل القرايةو ما نجمش يقول لأهلو ... قعد كاري مهم أهلو أنو يقرا، و بوه مازال يبعثلو في الفلوس و يكلم فيه باش يسألو على الدراسة .... تو هوينو دخل في حيط باش يهبل كيفاش باش يقنع أهلو بالحكاية خصوصا و أمو في الميعادات الكل تحكي على ولدها الدكتور، و زيد نسا الحومة الكل ولو ينادولها " يا أم الدكتور "